Vegar Skar – klar til å skænne fleire bilde.

Han har gjort eit uhorveleg stort arbeid for lokalhistoria i Fron dei siste 4-5 åra. Det er ingen annan måte å seie det på. –Eg vart spurt av Fron historielag om eg ville, seier Vegar Skar, – og sjølvsagt ville eg det.  Så kosta laget på han skikkeleg utstyr, og nå har han «skænna» bortimot 37 000 foto  frå ulike familiealbum. Trettisjutusen! Det tar om lag tre minutt å «skænne» eit bilde. Så da er det berre å rekne ut. Det skulle  bli 111 000 minutt, dvs 1850 timar, eller omlag eit heilt årsverk.

Frøningane kom med bilde. Men ikkje alle. Vegar Skar sa til ei dame at han skulle brenne bilda hennes på ein CD. Ein kan ikkje ordleggje seg slik, for ho gav ikkje frå seg bilde til brenning!

Vegar Skar sit på kommandoplassen sin heime i “Hyttebyen”, godt omringa av teknisk utstyr av alle slag. -Eg likar best å “skænne” frå glasplater og frå negativar, seier han, – for dei har lege i konvoluttar og er ikkje ripa opp og bleikte av lys, og dei har ikkje fingeravtrykk. Kvar har han alle desse 37 000 bilda? På harddisk heime, sjølvsagt. Men det ligg òg ein harddisk med foto i banken. Dei er tatt vel vare på for ettertida. Så er det opp til historielaget å gjere dei tilgjengelege. Mange av dei kjem på heimesida og Facebook-sida etter kvart.

Vegar Skar tek framleis imot foto av historisk interesse til framtidig bevaring. Det er berre å sjå etter i kommodar og i gamle album. Gjer du bilda dine tilgjengelege for Fron historielag, får du dei også med deg heim, digitalisert på ein CD. Av Vegar Skar.