Dei skifta namn i september. I oktober 1896 opna dei Vinstra stasjon. Finst det eit bilde av Sødorp stasjon?

RAGNAR ØVRELID: Sommaren 1896 dampa dei første jernbanetoga gjennom Fron. Toget stoppa på stasjonane Hundorp, Harpefoss, Sødorp, Kvam og Koloen. Det var ein del usemje i Fron om plassering av stasjonane, og kva dei skulle heite. Planen frå 1892 hadde plassert Hundorp stasjon på Jetlund. Sør-Fron ville ha stasjonen ved sundstaden. Statsbanene bøygde seg. I Nord-Fron vart det ein dragkamp mellom Byre og Sødorp. Ole Brandvol ville gi gratis grunn dersom stasjonen vart lagd til Sødorp. Men fleirtalet i kommunestyret heldt på at stasjonen burde ligge så nær det nye senteret kring Sundbrua og kommunehuset på Byre som råd.

Statsbanene hadde foreslått stasjonsnamna Vinstra, Kvam og Sjoa. I 1892 fann Nord-Fron kommunestyre namna Vinstra og Sjoa kunstige. Som stadnamn hadde dei ingen tradisjon. Kommunestyret ville heller ha stasjonsnamna Sødorp og Koloen.

Igjen bøygde Statsbanene seg for den lokale meininga. Men i 1895 hadde kommunestyret skift meining, Nå ville dei ha namna Sjoa og Vinstra likevel,

da man finner at denne benevnelse er mest stemmende med andre stasjonsnavn på Tretten-Sell-banen.

Banen vart opna med stasjonsnamna Sjoa, Kvam og Sødorp. Men alt i september 1896 vart Sødorp stasjon omdøypt til Vinstra.

Frå Historia om Fron, bind 1, publisert her første gong 17. september 2014